Grup ABAIM – bann zoli tras dan 4 albem

1988 : enn nesans orizinal

Tule lane, nu lasosyasyon ti abitye invit bann artis pu vinn anim so fet fin dane. Sa lane la, nu ti deside ki nu bann kamarad ki konn zwe enn linstriman pu amin fet la zot mem. Ala kuma tu finn kumanse. Laminasyon sa fet la ti telma enn gran sikse ki nu finn desid pu kontinye zwenn apre pu kontinye partaz ek aprann ek nu kamwad atraver lamizik.

1992 : enn lot sezon

Apre 4 an travay, resers, zwe an piblik, nu premye albem sorti. Dan lepok kot nu pei ti pe travers enn dezer onivo kreasyon mizikal, “ enn lot sezon” amenn enn nuvo son. Abaim fer tann enn bann nuvo son, so demars pup wiz depi bann diferan tradisyon koste lamizik ek plezir lekut bann dimunn Moris. Abaim sant “labutik an tol”, “lalinn kann”, “sanzman sezon”, “mo priye bondye”. Depi so pli tipti ziska so pli gran, dimunn apresye sa nuvo manyer fer lamizik la usi. “labutik an tol” sorti sega de lane pu premye fwa ki ena enn zafer kumsa organize pus ante morisyen dan radyo Moris.

1994 : enn zur dan enn pei

Travay resers kontinye dan ABAIM. Lamizik kontinye vinn enn platform pu dimunn ek diferan abilite pu zwenn ek partaz seki zot ena de pli profon, savedir, lamur pu limanite. Nu gran respe pu tu seki finn kree avan amenn admir rises nu listwar, fer nu konn nu patrimwann. « Kanar » ne parmi sa kalite kreasyon la. Zordi, kapav konsider li kuma enn « klasik » dan sante Moris. Sa albem « enn zur dan enn pei » la fer appel a limazinasyon popiler ki nu tu pe sarye depi ki ena dimunn lor later Moris. Anmemtan, li enn konba pu rekonesans langaz kreol. Alor ki « kanar » denons bann politisyen ki pass zot letan kokin mari uswa fam zot kamwad kumadir nannye ditu, « mon rwa » denons depi sa lepok la mem, enn sistem politik puri ek so bann kurtizan dan basin koripsyon. « Tamarin » frisonn nu memwar letan « solitid rayot suvernir lor pon remonte ». Surfrans nu bann ser dan zonn frans fer nu sant « kadna » dan laport sa lizinn, alor ki ena tap lestoma ek zot dezyem faz indistrializasyon. Eddy Labrosse mor dan selil. Nu pe sant « Gulu Gulu ». Avan li ti ena Viktorine. Apre li Kaya enn artis.

1996 : lerla…

Antretan, Abaim finn zwe lamizik partu dan pei. Nu finn viv enn lekperyans memorab dan Rodrig. Enn zoli koinsidans : dimunn andikape dan rodrig kumans pey demi dan bis apre nu bann konser dan lil. « lerla », nu trwazyem albem sorti dan enn peryod sanzman politik dan pei. Dimunn ranpli ar lakoler me ena tro buku swiver. « Vyun Vyun » rakont kimanyer konper zako ti fini dan marmita fors li nek sivre tu kalite ninport. « Mons mekanik », « Dir mwa zan », « fifinn », Dekrir langwas lor linto laport dimunn ler pe mekaniz karo, ler nu bann ser pe viv « 15 zur rinte lor masinn zis pu bus det Tonyo dan Senn Mars ». Me « lerla » enn gran omaz a lavi lor lakot, enn omaz a sa zenerasyon ki pe ale, a Ton Pol, Ton Fael … Enn leksperyans Sesel anrisi nu lamizik e inspir nu pu konpoz « Ilo » akot nu byin tuse par ritm spesyal nu bann frer ek ser derasine depi dan zil. Abaim invant enn prose lakur ar bann zanimo dan « kikiki ». « Pov ti pu ! Vomye ki li ti al vir vann mem pu kone kisannla finn kokin so dizef. » Sistem lakur sa.

1999 : enn syek de syek

Enn syek de syek…Abaim … Pu tu bann lamizik ki finn kree lor later Moris avan mem nu ti ena lide fer lamizik
Enn syek de syek …Abaim… Pu dir nu kontantman dan enn kawal kan Ton Klod met chule « rule matant » lerla Tizak reponn « arre va !va !va !
Ennsyek de syek… Abaim… Pu « Anyes » dan zardin konpani kan li mazinn « so baba pre kot kolon lili »
Enn syek de syek …Abaim… Pu « rezistans » depi Anna de Bengal pass par tu bann lagrev ek dife dan kann, ziska lekor sa pep la nepli dakor pu res kaya kaya.
Enn syek de syek…Abaim… Pu « karapat » dan « labraget lotorite kip e vey seke pu rantre »
Enn syek de syek…Abaim… Pu kontinye kit bann zoli tras, bann zoli reper, bann bon koze…depi Abaim